Төгсөгчдийн “Хонхны баяр” эхэлжээ

2010 оны 4 сарын 1

Жил жилийн хаварт нийслэлийг хөл ихтэй болгодог их, дээд сургуулиудын төгсөлтийн баяр эхэлжээ. Өнөөдөр л гэхэд Сүхбаатарын талбайд хэд хэдэн их, дээд сургууль хонхны баяраа тэмдэглэж байв. Гэхдээ хаврын урь орж, урин дулаан цаг айлсах болсон ч дөрөвдүгээр сар гарч байгаа энэ өдрүүдэд цаг агаар харьцангуй хүйтэн сэрүүн байгаа тул оюутнуудад нэлээд тухгүй байгаа бололтой. Хоёр хоногийн өмнө орсон цас хайлж амжаагүй байгааг ч хэлэх үү, хөнгөн нимгэн хувцсаар гоёсон баяр тэмдэглэж байгаа охид, бүсгүйчүүд зургаа авахуулах гэж нэлээд эр зориг гаргаж байгаа харагдав. Учир нь өнөөдөр гадаа хүйтэн, тэгээд ч Сүхбаатарын талбай халтиргаа гулгаа ихтэй, хажуугаар нь багш нар жагсаал, цуглаан хийгээд баяр тэмдэглэж яваа залууст зутруу өдөр байлаа.